Euskadi ekimen ugari gauzatzen ari da hidrogenoaren teknologien jarduna bultzatzeko; horien artean, honako hauek azpimarratu ditzakegu:

• Euskal Herriko Itsas Foroak jarduera-ildo estrategiko espezifiko bat abiatu du hidrogenorako, eta ingurumen-erronkei heldu eta teknologiak hidrogenoaren alorrean garatzen dituzten zenbait proiektu garatu nahi ditu itsas sektorean, erronka horiei erantzuteko eta euskal itsas industria lidergo posizioan kokatzeko, gure enpresek aberastasuna eta enplegua sortu ahal izan ditzaten.
• 2020an, “Hidrogenoaren Euskal Korridorea – BCH2” ekimena sortu zen, Petronorrek bultzatuta.
• Bizkaiko Foru Aldundiak eta Petronorrek “Hidrogenoaren euskal huba” deritzan proiektua sustatu dute, hidrogenoaren inguruko garapen industrial eta teknologikoa bultzatzeko eta prozesu industrialak zein mugikortasuna deskarbonizatzen laguntzeko.
• Hidrogenora zuzendutako unitate bat sortu da ”Energy Intelligence Centerren” (EIC), eta “Hidrogenoaren Living Lab” Abantoko Teknologia Parkean.
• RIS3 Energiaren Pilotatze Taldeak adostu du hidrogenoaren eremua Energiebasque-ren arlo estrategiko berri gisa txertatzea, aurretik definitutako 8 arloei gehituz.

Proiektuaren deskribapena:

HYSHORE proiektu honek hainbat sektoretako euskal enpresen ikerketa eta garapen teknologikoari heltzen dio hidrogenoaren balio-katearen parte garrantzitsu batean, alegia, offshore parke eolikoetan sortutako hidrogeno berdearen garraio eta logistikaren arloan. Irtenbide teknologikoak garatuko dira materialen, osagaien eta sistemen alorretan eta haien fabrikazio-prozesuetan, eremu horretan dauden problematika teknologikoei lotuta.

Proiektuaren helburua:

HYSHORE proiektuaren Helburu Nagusia da Euskadiko Itsas, Offoshore Berriztagarri eta Oil&Gas (beraren transformazio-prozesuan)industrien eta Hidrogenoaren industria berriaren kapazitateak dinamizatzea eta indartzea. Asmoa da irtenbide teknologiko berriak garatzea (materialak, prozesuak eta fabrikazio-bitartekoak, osagaiak eta sistemak) offshore parke eolikoetan sortutako Hidrogenoaren garraio eta logistikaren aplikazioetarako, bi bide aurreikusiz: pipeline eta itsasokoa.

Partzuergoko enpresek lankidetzan gauzatuko dituzten ikerketen helburua izango da Hidrogenoa lehorrera garraiatu dezaketen azpiegitura eoliko flotagarrien eraikuntza eta operazioaren batez besteko osoko kostuak optimizatzen dituzten irtenbide teknologikoak garatzea, haien balio-bizitzak dirauen bitartean aplikatzeko xedez.

Era honetan, sistemen hasierako kostuez gain, operazio-alderdiak eta haien balio-bizitza osoan -25 urtetiko gorakoa izango da- atxikitako kostuak ere hartuko dira kontuan.